كشف الفنان محمد رمضان تفاصيل تعاونه مع لارا ترامب في أغنيتهما التي طُرحت عبر قناته الرسمية على يوتيوب، مشيرًا إلى أنه حرص على الإشارة إلى وطنه مصر خلال كلمات الأغنية.
وقال محمد رمضان في مداخلة هاتفية مع الإعلامي تامر أمين، خلال برنامجه “آخر النهار”:
ترامب ما شاء الله بيوته كتير في كل ولاية، وصورنا في بيت عائلة ترامب في ميامي وده مكان إقامتهم، وأنا سعدت جدًا بالتجربة وإن شاء الله فيه تعاون تاني قادم. أنا سعيد باختياري وإن أنا قدرت الحمد لله أعرف أتحايل على الكلمات وأحط حاجة تبقى مرتبطة ببلدي مصر، وإحنا بنتشرف ببلدنا في كل حتة في العالم. إحنا محظوظين أننا اتولدنا مصريين، وده أقل واجب لبلدنا.
وأضاف رمضان:
الأغنية الرسمية لكأس أمم إفريقيا اللي فات، دي أغنية معمولة للبطولة وصورتها في المغرب، ولكن تحايلت على الكلمات وقلت من 1000 سنة العالم كله عارف مين أنا، أي شيء برا مصر هحاول بقدر الإمكان أقول أو أشاور على بلدي. ومش عايز أقول ضريبة ولكن ده أقل واجب لأن البلد دي اللي صنعتنا وكبرتنا، وشعبها العظيم أهلي وحبايبي هما اللي صنعوا اسمي، وهم اللي بيقرروا مين ينجح ومين يكبر، وأنا بدين بالفضل ليهم بعد ربنا في كل شيء وكل خطوة.
