شاركت الفنانة لقاء الخميسي متابعيها مقطع فيديو جديدًا عبر حسابها الرسمي على مواقع التواصل الاجتماعي، ظهرت خلاله برفقة زوجها الكابتن محمد عبد المنصف وأولادهما، في ظهور عائلي لافت، وذلك في أول تعليق لها على الجدل الذي أُثير مؤخرًا بشأن أنباء زواج زوجها من الفنانة إيمان الزيدي.
وقالت لقاء الخميسي عبر إنستجرام: «الدنيا بتختبرنا دايماً وأبداً، أيام بتسعدنا وأيام بتبعدنا وتزعلنا وتجرحنا.. وبنتوه مع نفسنا! الحكمة بتظهر من قلب الحزن، وبنقعد نفكر إيه الصح وإيه الغلط وهل اللي عدينا بيه شر ولا خير.. ومع الوقت، ولما النفس تهدى والعقل يفكر والقلب يدق، بنكتشف إن كلنا بنغلط وبنتوه شوية في وسط الزحمة».
وتابعت: «في ناس بتغلط وتكمل في الغلط، وفي ناس بتغلط وبترجع لحكمتها وتندم وتصحح الخطأ. “خطّاؤون وخير الخطّائين التوابون”، مفيش حد مبيغلطش، بس القوي الحقيقي بيعترف بالغلط وبيرجع لصوابه، وربنا فتحلنا باب المغفرة والسماح».
وواصلت: «شكراً من قلبي لكل إنسان دعمني ووقف جنبي وطبطب عليا، وشكراً لكل أصدقائي المقربين اللي وقفوا جنبي، وكل من دعمني من أصدقاء السوشيال ميديا اللي نوروا حياتي بالمحبة وطبطبوا على قلبي ودعولي دعوة حلوة».
وأضافت: «آخر حاجة هاقولها، أسهل حاجة في الدنيا هدم البيوت العمرانة، وأقوى حاجة في الدنيا إننا نحافظ على حياتنا ونحارب على بيوتنا وأولادنا بالحب والسلام.. كلنا بنغلط، وبنندم وبنرجع لصوابنا، ونبدأ من جديد ببداية مليانة شغف وحب وسلام وراحة بال».
واختتمت حديثها قائلة: «لكل ست وربة منزل، حافظي على بيتك وعيلتك بكل قواكي، وأوعي تدي الفرصة لأي إنسان إنه يهدم بيت العيلة».
